Presidentja Vjosa Osmani, në mbledhjen e Këshillit të Sigurimit të Kombeve të Bashkuara, ka marrë me vete edhe heroinat, Fahrije Hotin, Vasfije Krasniqin, Elmaze Muçollin dhe Shyhrete Tahirin.
Pas përfundimit të mbledhjes së Këshillit të Sigurimit, e mbijetuara e dhunës seksuale gjatë luftës në Kosovë, Vasfije Krasniqi-Goodman, në një postim në Facebook, ka shkruar se sa herë jemi në kushte të barabarta, Serbia humb çdo betejë.
“Derisa, Goebbelsi i Millosheviçit, i cili mban anën e së keqes (tek e fundit, aty e ka vendin) dhe bënte propagandë kundër Kosovës e shqiptarëve.
Në anën tjetër, në anën e drejtësisë, të vërtetës e demokracisë, Presidentja e Republikës së Kosovës, Dr. Vjosa Osmani-Sadriu, shpërfaqi të vërtetën e cila si asnjëherë më parë u tha qartë e më zë të lartë se Serbia, ka kryer krime… “merr guximin e kërko falje për krimet që keni bërë””, ka shkruar Krasniqi-Goodman.
Krasniqi-Goodman ka shtuar se pavarësisht se ishin ekip këshillëdhënës, fillimisht nuk u është lejuar hyrja në sallë.
“Pavarësisht se ne ishim ekip këshillëdhënës fillimisht nuk na është lejuar hyrja në sallë, por me insistimin dhe këmbënguljen e Presidentes një gjë e tillë u lejua dhe NE, e shoqëruam Presidenten në takim. Ky ishte një hap shumë i rëndësishëm drejtë rrugës dhe misionit tonë”, ka shkruar tutje ajo.
Kujtojmë se, muaj më parë, presidentja Vjosa Osmani emëroi Vasfije Krasniqin në pozitën e së dërguarës së posaçme për dhunën seksuale gjatë luftës.
Ajo ka thënë se Krasniqi i ka dhënë zë dhimbjes së mijëra grave të përdhunuara gjatë luftës së fundit në Kosovë.