Vendin në gjykatore e kanë të posasçshëm, por prokurorët e çështjeve shpeshherë nuk janë aty për ta zënë.
Jo më larg se të premten, në aktgjykimin e Enver Sekiraqës nuk qe prezent prokurori i çështjes.
Ndërsa muajin e kaluar, prokurori nuk mori pjesë në shpalljen e aktgjykimit as në rastin e vrasjes së Sadije Godenit nga bashkëshorti i saj.
E, mungesa e prokurorëve në seanca të tilla vlerësohet si mungesë serioziteti.
“Pavarësisht që prania e tyre nuk është ligjërisht e obliguar, unë mendoj që ata duhet të jenë aty për arsye se nuk është serioze që një gjykim ta përcjellësh pothuajse në 10-15 seanca e pastaj të mos marrësh pjesë në seancën më të rëndësishme sepse vërtetohet e gjithë puna e prokurorit”, tha Arbër Jashari, avokat.
Në anën tjetër, Instituti i Kosovës për Drejtësi thotë se mungesa prokurorëve në shpalljen e aktgjykimeve në raste të rënda është më e zakontë.
Por IKD ndan të njëjtin mendim për nga aspekti profesional.
“Kemi pa që prokurorët nuk janë prezent në aktgjykim e që po them prapë, në shpallje të aktgjykimit, nuk është e obligueshme prezenca e palëve në procedurë thjeshtë bile trupi gjykues për këtë rrethanë njofton që të njëjtit mund edhe të mos jenë prezent se nuk e kanë domodsoshme. Mund t’kenë qenë t’ngarkuar me çështje tjetër por gjithsesi nuk do shumë mend që po t’ishte prokurori prezent në shpallje të aktgjykimit do jepej një seriozitet më i madh nga ana e prokurorisë”, tha Flamur Kabashi nga IKD.
Shpesh prokurorët ndjekin me vite të tëra raste të caktuara, siç ishte ai ndaj Enver Sekiraqës për gati dy dekada.