Më 6 vota për, 3 abstenime dhe asnjë kundër Këshilli Prokurorial i Kosovës (KPK), në mbledhjen e 247-të të mbajtur të hënën ka vendosur që anëtarëve joprokurorë të Këshillit t’iu takojë paga e prokurorit të Departamentit të Krimeve të Rënda.
Fillimisht, tre prej anëtarëve nuk morën fare pjesë në votim, raporton “Betimi për Drejtësi”.
Ish-kryesuesi, tashme anëtari Jetish Maloku u shpreh se arsyeja se pse nuk mori pjesë në votim ishte se nuk e kishte të qartë, pasi kryesuesi Ardian Hajdaraj kishte futur si pikë aktin e dorëheqjes nga anëtari joprokuror, Visar Krasniqi.
Kryesuesi Hajdaraj tha se ajo është pikë e ndarë e rendit të ditës, dhe se fillimisht do të vendosin për pagën e gjithë anëtarëve joprokurorë, dhe kjo nuk është arsye për të mos marrë pjesë në votim.
Këshilli shkoi përreth 5 minuta në diskutim të mbyllur, dhe pasi u kthye me votim ku edhe u plotësua kuorumi për ta kaluar këtë vendim.