Deputeti i VV-së, Enver Dugolli, është shprehur i shqetësuar pas raportimeve të Dukagjinit për konkursin për gradim të policëve nga “Polic i lartë” në “Rreshter”, gjegjësisht gjatë testit me shkrim, ka pasur keqpërdorime e parregullsi.
Dugolli ka thënë se “nuk ka vyen asnjë proces që ka dilema” dhe rezultatet e këtij konkursi lënë vend për dyshimet se ka pasur favorizime.
“Sa për korrekti, edhe ne jemi të shqetësuar me raportimet që kanë dalë me rastin e rekrutimit të fundit për gradën “Rreshter” të këtij procesi dhe ju inkurajojmë që të vazhdoni hetimin e pavarur dhe ashtu siç dini të bëni pa ndikime. Sepse ne jemi të interesuar që ai proces të sqarohet në tërësi.
Të mos ketë dilema nga askush, nuk ka vyejnë asnjë proces që ka dilema. Edhe rezultat nga ato që kemi parë lënë për të dyshuar që nuk ka shkuar gjithçka në rregull. Por, megjithatë nuk po e predikojmë hetimin, i presim rezultatet me padurim dhe besojmë në ato rezultatet që do t’i publikoni”, ka thënë Dugolli në Komisionin për Siguri.
Kurse kryeshefi i Inspektoratit Policor të Kosovës, Kushtrim Hodaj, ka pohuar se derisa të dalë me raportin final, IPK-ja, në lidhje me dyshimet për favorizime dhe keqpërdorime në konkursin për gradim e policëve, duhet të ketë një pezullim të përkohshëm të këtij konkursi.