Kryeministrja e Bangladeshit ka dhënë dorëheqjen dhe ka ikur në Indi pas disa javësh protestash vdekjeprurëse në vend.
Kjo vjen një ditë pasi përleshjet mes policisë dhe protestuesve lanë të paktën 90 të vdekur në Bangladesh.
Raportet e dorëheqjes së kryeministres Sheikh Hasina, 76 vjeç, u konfirmuan nga ushtria, si dhe zyrtarë të Komisionit të Lartë të Bangladeshit në Delhi.
Protestuesit në Bangladesh kanë sulmuar rezidencën zyrtare të kryeministres Sheikh Hasina në kryeqytetin Dhaka, raporton BBC.
Sipas raportimeve, “vendi i sigurt” ku është drejtuar Sheikh Hasina është fqinji i tij gjigant – India, ku është nisur me një helikopter ushtarak.
Me kalimin e viteve, India ka qenë aleati i saj më i madh dhe kjo ka funksionuar mirë për të dy vendet.
Bangladeshi ndan kufij me një numër shtetesh verilindore të Indisë – shumë prej të cilave janë përballur me militantët gjatë dekadave, dhe një regjim miqësor në Dhaka ndihmon për këtë.
Ndryshe, të paktën 95 persona, duke përfshirë të paktën 14 oficerë policie, vdiqën në përleshjet në Balngadesh, ndërsa qindra të tjerë u plagosën.
Demonstratat filluan me studentët që kërkonin t’i jepnin fund një sistemi kuotash për vendet e punës, por përleshjet me policinë dhe aktivistët pro-qeveritar u përshkallëzuan në dhunë që la më shumë se 200 të vdekur muajin e kaluar.
Kjo shkaktoi më shumë protesta duke kërkuar përgjegjësi nga qeveria, të cilat janë shndërruar në thirrje për Hasinan që të japë dorëheqjen.