Presidenti i Ukrainës, Volodymyr Zelenskiy, ka deklaruar se inkursioni ushtarak i Ukrainës në rajonin Kursk të Rusisë synon të krijojë një zonë për të parandaluar sulmet e mëtejshme nga Moska.
Kjo është hera e parë që Zelenskiy ka shprehur qartë qëllimin e këtij operacioni, i cili filloi më 6 gusht, duke theksuar rëndësinë e shkatërrimit të potencialit luftarak rus dhe kryerjen e kundërsulmeve maksimale.
“Tani është detyra jonë kryesore në operacionet mbrojtëse në përgjithësi të shkatërrojmë sa më shumë potencial luftarak rus dhe të kryejmë veprime maksimale kundërsulmuese. Kjo përfshin krijimin e një zone tampon në territorin e agresorit – operacionin tonë në rajonin e Kurskut”, ka thënë Zelensky, shkruan “The Guardian”.
Forcat ukrainase po arrijnë rezultate të rëndësishme në këtë ofensivë, duke përfshirë përparimin në mbi 1000 km katrorë të territorit rus, sipas pretendimeve të komandantit të përgjithshëm ukrainas, gjeneralit Oleksandr Syrskyi.
Instituti për Studimin e Luftës ka raportuar se operacioni i Ukrainës në Kursk ka përparuar në 800 km katrorë gjatë ditëve të para të tij, duke goditur pozicionet mbrojtëse ruse që ishin të papërgatitura. Ukraina ka vazhduar të ndërmarrë veprime të shpejta në këtë rajon, përfshirë shkatërrimin e urave kyçe që përdoreshin nga Rusia për furnizimin e trupave të saj.
Ndërkohë, Rusia ka mohuar raportet se sulmi i Ukrainës në Kursk ka prishur bisedimet indirekte midis dy vendeve për ndalimin e sulmeve ndaj infrastrukturës energjetike. Këto bisedime, që supozohej të zhvilloheshin në Katar, thuhet se u anuluan për shkak të veprimeve të Ukrainës.