Ministri gjerman i Ekonomisë, Robert Habeck, është duke përgaditur masa të mëtejshme që të frenojë konsumin e gazit natyror dhe të largohet nga furnizimet, tashmë të reduktuara të gazit rus, raporton agjencia gjermane e lajmeve “DPA”.
Ai ka thënë se qeveria në Berlin është duke ofruar miliarda euro financim, për të mbështetur reduktimin në përdorimin e gazit për energji dhe industri.
“Objektet e magazinimit gjithashtu do të mbushen më tej përpara fillimit të dimrit”, ka thënë ai.
Gjiganti i gazit rus, “Gazprom”, ka njoftuar për reduktime të përsëritura këtë javë të dërgesave të saj përmes gazsjellësit “Nord Stream 1” në Gjermani, duke përmendur probleme teknike.
Ministri gjerman i Ekonomisë, Robert Habeck, e ka quajtur këtë veprim një “vendim politik dhe jo një zgjidhje teknikisht të justifikueshme”.
Ndër të tjera, evropianët kanë vendosur sanksione financiare, udhëtimi, diplomatike dhe të tjera ndaj Rusisë qëkur Presidenti i Rusisë, Vladimir Putin, urdhëroi sulme nga dhjetëra mijëra trupa ruse në territorin e Ukrainës më 24 shkurt.
Tradicionalisht, Gjermania është një nga klientët më të mëdhenj të gazit në Rusi.
Ndërkohë “Gazprom”, tashmë ka ndërprerë furnizimin me Bullgarinë, Poloninë, Finlandën, Holandën dhe Danimarkën.