Shërbimi Korrektues i Kosovës ka thënë se është duke mbështetur Forcën e Sigurisë së Kosovës (FSK) lidhur me përgatitjen e ushqimit për personelin e saj.
“SHKK është duke mbështetur FSK-në, por kjo mbështetje do të jetë vetëm për një periudhë tranzitore afatshkurtër, deri në rekrutimin e stafit profesional”, ka thënë SHKK-ja në një përgjigje për Dukagjinin.
Ndërkohë, Dukagjini mëson se SHKK-ja tashmë ka angazhuar tetë punëtorë për të përgatitur ushqimin për ushtarët e FSK-së.
Ministria e Mbrojtjes së Kosovës ka thënë se të gjitha kuzhinat në kazermat e FSK-së po funksionojnë si zakonisht, duke shërbyer shujtat ditore të zakonshme.
Ndërsa, nga fotografia e siguruar nga Dukagjini, dreka e shtruar këtë të hënë për ushtarët e FSK-së nuk ka qenë e zakonshme dhe e plotë si ditët e kaluara.
Sipas njoftimit të ministrisë, ushqimi aktualisht po përgatitet nga kuzhinierët e huazuar nga Qendra Studentore dhe Shërbimi Korrektues i Kosovës.