Presidenti i Francës, Emmanuel Macron, do të takohet të martën me kundërshtarët politikë, pasi koalicioni i tij nuk arriti të fitojë shumicën e votave në zgjedhjet parlamentare.
Macron tani është nën presion për të siguruar mbështetje nga rivalët për të përmbushur agjendën e reformave të qeverisë së tij, raporton BCC, transmeton Portali D.
Por, as e djathta ekstreme e Marine Le Pen dhe as aleanca e majtë jeshile e Jean-Luc Mélenchon nuk janë të prirur të punojnë me të.
Qeveritë e pakicave janë një gjë e rrallë në Francë dhe aleanca e Ansamblit të presidentit Macron ka 44 vende larg shumicës.
Kjo do të thotë se atij do t’i duhet të gjejë mbështetje nga deputetët kryesorë nga ana e majtë dhe e djathtë e politikës për të ndihmuar në ndërtimin e një mazhorance pune.
Përfaqësuesit e partive do të vizitojnë pallatin Élysée veçmas për bisedimet e nivelit të lartë të martën dhe të mërkurën.
Analistët thonë se presidenti mund të shikojë një marrëveshje me republikanët e krahut të djathtë dhe partia ka konfirmuar se udhëheqësi i saj, Christian Jacob, do të marrë pjesë në bisedime.
Le Pen do të marrë pjesë, por Mélenchon jo, këtë e ka bërë të ditur agjencia e lajmeve AFP.
Udhëheqësi i Partisë Socialiste Olivier Faure dhe shefi i Partisë Komuniste Fabien Roussel, anëtarë të aleancës së krahut të majtë Nupes, do të takohen gjithashtu me Macron.
Macron do të duhet, gjithashtu, të zëvendësojë tre ministra që humbën vendet e tyre në votimin e së dielës dhe e ardhmja e kryeministres Elisabeth Borne duket gjithnjë e më e kërcënuar.
Në zgjedhjet e së dielës pati një pjesëmarrje të ulët, me një përqindje abstenimi prej 53%.