Të hënën, më 14 tetor, Kuvendi i Kosovës do të mbajë një seancë të jashtëzakonshme për të diskutuar problemin e furnizimit me ushqim për Forcën e Sigurisë së Kosovës (FSK).
Kjo seancë është kërkuar nga Grupi Parlamentar i Aleancës për Ardhmërinë e Kosovës (AAK), i cili ka mbledhur 43 nënshkrime nga deputetët për të siguruar mbajtjen e saj.
Shefi i Grupit Parlamentar të AAK-së, Besnik Tahiri, ka bërë të ditur përmes një postimi në Facebook se propozim-rezoluta që do të shqyrtohet në seancë i obligon Qeverinë dhe Ministrinë e Mbrojtjes të zgjidhin me urgjencë këtë çështje.
“Propozim Rezoluta është e thjeshtë: Kuvendi i Republikës së Kosovës e obligon Qeverinë, Ministrinë e Mbrojtjes, që me urgjencë ta zgjidhë çështjen e furnizimit me ushqim si dhe me të gjitha pajisjet tjera të nevojshme,” ka theksuar Tahiri në një postim në Facebook.
Sipas tij, deputetët mund të bëjnë plotësime në draftin e Rezolutës gjatë seancës.
Ndërkohë, Ministri i Mbrojtjes, Ejup Maqedonci, ka njoftuar të dielën se janë bërë përpjekje për të siguruar furnizimet e nevojshme, me qëllim që ushqimi për personelin e FSK-së të ofrohet në mënyrën më të mirë të mundshme.