Shefi i NATO-s, Mark Rutte, është nisur drejt Kosovës në orët e hershme të mëngjesit të sotëm, nën përkujdesjen e forcave ajrore të Italisë.
Ambasadori Astrit Zemaj, përfaqësues i Republikës së Kosovës për marrëdhëniet me NATO-n, e ka cilësuar këtë vizitë si një moment historik për vendin.
“Ditë historike KOSOVË – NATO. Vizita më e madhe dhe më e rëndësishme e NATO-s në vendin tonë në vitet e fundit”, ka shkruar Zemaj në Facebook.
Ai ka theksuar se Kosova mbetet mirënjohëse ndaj aleatëve dhe partnerëve për mbështetjen dhe kontributin e vazhdueshëm në forcimin e subjektivitetit ndërkombëtar, si dhe për paqen, sigurinë dhe stabilitetin në rajon.
Sipas tij, në këtë vizitë janë përfshirë Këshilli i Atlantikut të Veriut të NATO-s (NAC 32 Aleatët) dhe partnerët, së bashku me strukturat më të larta drejtuese civile dhe ushtarake të Aleancës.
