Kryetari i PDK-së, Memli Krasniqi, pas takimit të thirrur nga presidentja Vjosa Osmani për të diskutuar për zgjidhjen e ngërçit politik, ka deklaruar se situata mbetet e njëjtë, por takimi duhet të shihet si një përpjekje shtesë për të gjetur rrugëdalje.
“Situata është e njëjtë. Duhet ta shohim këtë takim si një hap para, një përpjekje shtesë edhe nga ana e involvimit të presidentes në këtë temë…Kërkova që kryetari i VV-së ta ndryshojë kandidatin. Të vijë me një propozim që e merr shumicën parlamentare. Nuk pres të ndodhë ky ndryshim, nga ana e Kurtit”, ka deklaruar Krasniqi.
“Kam propozuar që presidentja, në zbatim të përgjegjësive që i ka për të garantuar funksionimin kushtetues të institucioneve, që në një moment kur ajo e vlerëson të nevojshme, t’i drejtohet Gjykatës Kushtetuese, qoftë me një pyetje apo përmes dërgimit të një lënde në Kushtetuese për gjithë procesin zgjedhor. Ne kemi një problem politik. Nuk besoj që ka dalë tym i bardhë”, ka njoftuar Krasniqi.
Ai ka shtuar se kriza nuk është procedurale, por politike, dhe kërkon zgjidhje politike.
“Nëse kjo qasje autoritare vazhdon, do të bëjmë çmos për të gjetur zgjidhje. Të gjitha zhvillimet në Kuvend mund t’i çojmë në Kushtetuese”, ka deklaruar ai.