Misioni i NATO-s në Kosovë, KFOR, ka zhvilluar të dielën një trajnim për evakuim mjekësor ajror në selinë e tij në Kampin “Film City” në Prishtinë.
Sipas njoftimit zyrtar, në këtë trajnim kanë marrë pjesë njësi mjekësore nga katër ushtri, Shtetet e Bashkuara të Amerikës, Hungaria, Gjermania dhe Zvicra.
Qëllimi i stërvitjes ishte përgatitja e pjesëtarëve të KFOR-it për situata të vërteta emergjente, me fokus në evakuimin ajror të të plagosurve. Gjatë ushtrimeve, pjesëmarrësit janë trajnuar për mënyrën e ngarkimit dhe shkarkimit të pacientëve gjatë fluturimeve mjekësore.
KFOR-i thekson se ky trajnim ndërkombëtar ndihmon në sigurimin e një reagimi të përbashkët, të koordinuar dhe efikas në raste krizash mjekësore, duke standardizuar procedurat mes vendeve pjesëmarrëse.