Përfaqësuesit e partive opozitare, e kanë kritikuar Bashkimin Evropian, për mosliberalizimin e vizave për shtetasit kosovarë.
Ata thonë se Kosova tashmë i ka plotësuar të gjitha kriteret e caktuara nga BE-ja, për mundësinë e qytetarëve të Kosovës që të udhëtojnë lirshëm, pa kufizime.
Deputeti i Partisë Demokratike të Kosovës (PDK), Mërgim Lushtaku, ka thënë se BE-ja po tregohet hipokrite, sepse sipas tij, Kosova i ka kryer “punët e saja”.
Tutje, Lushtaku, ka thënë se Kosova nuk duhet ta marrë përsipër asnjë udhërrëfyes të ri për liberalizimin e vizave.
“Asnjë udhërrëfyes tjetër nuk është në favorin tonë, dhe është diskriminues për ne si Kosovë sepse po tregon që ka standard të dyfishtë për të bërë liberalizimin e vizave për Kosovën. Kjo nuk na takon neve si politikë sepse po të kishte qenë përgjegjësia jonë, ne kemi përfunduar në vitin 2014-2015 këtë obligim dhe ishte dashur të marrim liberalizimin e vizave, por fatkeqësisht në këtë aspekt nuk kemi mundësi të bëjmë më shumë sepse është në dorën e BE dhe shteteve anëtare të BE-së”, ka thënë Lushtaku për EO.
Sikurse kolegu i tij opozitar, edhe deputeti i Lidhjes Demokratike të Kosovës, Armend Zemaj, e ka kundërshtuar idenë e një udhërrefyesi të ri për vizat.
Ai ka potencuar se 95 kriteret e vendosura nga BE-ja, janë të plotësuara nga Kosova, edhe pse sipas tij, me vonesë për shkak të mosvotimit me kohë të demarkacionit me Malin e Zi.
“Kosova, diplomacia, por edhe të gjitha institucionet duhet të kundërshtojnë një udhërrëfyes të tillë, i cili është i padrejtë ndaj qytetarëve të Kosovës. 95 kritere të vendosura janë të deklaruara nga bashkësi evropiane që janë të plotësuara nga Kosova edhe pse me vonesë që lidhet me demarkacionin”, ka thënë ai.
Ndërkaq, deputeti nga radhët e AAK-së, Pal Lekaj, e ka quajtur diskriminues zvarritjen e procesit të liberalizimit të vizave për Kosovën.
Po ashtu, edhe Lekaj, e ka kundërshtuar një udhërrëfyes të ri për vizat.
“Qe sa vjet na është thënë se janë përmbushur të gjitha kriteret që janë kërkuar nga BE për liberalizimin e vizave, dhe tani është nonsens që të kërkohet një udhërrëfyes tjetër për të përmbushur kushte të tjera”, ka thënë Lekaj.
Ditë më parë, Ministrja e Punëve të Jashtme, Donika Gërvalla, ka deklaruar se nuk do të ketë liberalizimin të vizave për Kosovën as në muajin shtator.