Presidentja e vendit, Vjosa Osmani, me rastin e 32-vjetorit të miratimit të Deklaratës Kushtetuese, ka thënë se kjo ngjarje shënon hapin vendimtar për realizimin e ëndrrës shekullore për shtetin e Kosovës.
Osmani shprehet se 114 delegatë të Kuvendit të Kosovës, atëkohë morën guximin që në rrethana dhe kushte të jashtëzakonshme, nëpërmjet këtij akti heroik e juridik, ta artikulojnë vullnetin e popullit të Kosovës për trajtim të barabartë.
Ajo i ka falënderuar të gjithë ata që kanë kontribuuar në pavarësinë e Kosovës.
“Më tepër se tri dekada më parë, gra e burra patën guximin që Kosovës t`ia japin drejtimin e duhur, ta krijojnë bazën për subjektivitet të shtetit në ardhje, ndaj në këtë përvjetor falënderoj secilin që vuri një gur në projektin tonë historik për shtet. Themelet e shtetit janë ngritur mbi vendimin e delegatëve të 2 Korrikut, ndaj sot Kosova është shtet i pavarur, i lirë dhe sovran!”, deklaroi Osmani.
Të shtunën e 2 korrikut, shënohet përvjetori i miratimit të Kushtetutës së Pavarësisë së Kosovës.
Me 2 korrik të vitit 1990, 114 delegatë të pjesëve të ndryshme të Kosovës, e kishin miratuar publikisht Deklaratën Kushtetuese, me të cilën Kosova u shpall njësi e veçantë në kuadër të federatës së atëhershme jugosllave. Ky ishte një akt historik i pritur moti, dhe që shprehte aspiratat shekullore të popullit të Kosovës për pavarësi shtetërore e territoriale nga Serbia.