Kolegji i Gjykatës Supreme ka hedhur si të palejuar ankesën e prokurores Merita Gaka-Kurtishi kundër vendimit të Këshillit Prokurorial të Kosovës (KPK) për zgjedhjen e Elza Bajrami-Kastratit si anëtare e KPK-së.
Gaka-Kurtishi kishte kërkuar anulimin e vendimit të KPK-së të datës 13 nëntor 2025, duke pretenduar se procesi zgjedhor ishte i kundërligjshëm. Ajo gjithashtu kërkoi anulimin e njoftimit KZ-KPK të 1 nëntorit 2025 dhe detyrimin e KPK-së që të organizojë një proces të ri zgjedhor.
Pas shqyrtimit të dokumentacionit dhe vlerësimit të bazës ligjore, Gjykata Supreme konstatoi se ankesa nuk ishte e lejueshme.
Në vendim, Gjykata theksoi se lënda nuk lidhet me emërim ose shkarkim të prokurorit, as me shkarkimin e një anëtari të Këshillit Prokurorial – kategoritë e vetme për të cilat prokurorët mund të ankohen drejtpërdrejt në Gjykatën Supreme.