Kryetari i Partisë Demokratike, Sali Berisha, para mijëra protestuesve në sheshin “Dëshmorët e Kombit” ku edhe ka mbajtur fjalimin e tij kundër qeverisë së Edi Ramës, ka thënë se shpreson se BE këtë javë do të vendosë për hapjen e negociatave.
Gjithashtu, ai ka shtuar se Edi Rama nuk i do negociatat me BE-në, sepse ato sipas Berishës, do ta nxjerrin Ramën si demon i pushtetit dhe kryehajdut i Evropës.
“Miqtë e mi, këtë javë shpresoj që BE të vendosë hapjen e negociatave dhe u bëj thirrje nga kjo tribunë të hapin negociatat me Shqipërinë, mos të shkojnë shqiptarët për Edi Ramën, i cili do çdo gjë, por negociatat me BE nuk i do, sepse ato do ta nxjerrin atë lakuriq siç është, demon i pushtetit, kryehajdut i Evropës”, ka thënë Berisha.
Berisha është shprehur se Rama është tellall i Beogradit, dhe fut sherre te fqinjët e tij.
“Të dashur qytetarë, politika e jashtme si rregull nuk është çështje e mitingjeve dhe protestave, pro kur kryetari i qeverisë së vendit tënd bëhet tellall i Beogradit, kur ai fut sherre te fqinjët me gjuhën dhe sherret e tij, kur ai shëndërrohet në vasal të Vuçiq, kur ai rrethon Kosovën, nuk ka interesa shqiptare, por të parat ka interesat e Beogradit …”.
“Atëherë nuk mund të rri pa i thënë, Edi Rama populli opozitar shqiptar patriot kudo që janë, do t’i thonë ‘Jo’ ‘Ballkanit të Hapur’, ‘Jo’ Ballkanit të Beogradit, ‘Jo’ Ballkanit të Putinit, do t’i thonë ‘Po’ procesit të Berlinit, rrugës sonë drejt Evropës”, u shpreh Berisha.
Berisha para mijëra protestuesve: Edi Rama e ka vendosur monizmin e plotë