Kryeprokurorja e Prokurorisë Themelore në Pejë, Lumturije Vuçetaj, ka dhënë detaje lidhur me rastin e plagosjes së një personi, që ndodhi mëngjesin e së dielës brenda një lokali në qytetin e Pejës.
Ajo bëri të ditur se, në bashkëpunim të ngushtë me Policinë e Kosovës, janë identifikuar të dyshuarit për këtë rast, por se deri më tani ende nuk është arritur arrestimi i tyre.
Kryeprokurorja shtoi se motivi i plagosjes ende nuk është i qartë, për shkak të ndjeshmërisë së rastit dhe gjendjes shëndetësore të viktimës, e cila po trajtohet në Qendrën Klinike Universitare të Kosovës (QKUK).
“Janë siguruar pothuajse të gjitha provat dhe janë duke punuar në këtë drejtim. Në saje të mirë koordinimit me Policinë e Kosovës janë identifikuar tre persona, ku është arritur të dihet identiteti i tyre si dhe vendbanimi. Për shkak të rastit të ndjeshëm dhe për pasi viktima është duke u trajtuar në QKUK ende nuk kemi arritur që të dihet motivi i shkaktimit të këtij rasti, mirëpo jemi në punë të mbarë dhe shumë shpejt do të dalim me informacionin mbi arrestimin e të njëjtëve”, ka thënë Vuçetaj.