Të premtën e 8 korrikut, Policia e Shqipërisë ka realizuar një operacion antidrogë. Në këtë operacion janë sekuestruar 15 pako me kananbis në formë të çokollatës, të cilat po transportoheshin nga Tirana në Tropojë me anë të një autobusi.
Gjatë këtij operacioni në Kurbin, shërbimet e Policisë kanë ndaluar autobusin, ku dyshohej se ishte lënda narkotike, dhe pas kontrollit në pjesën e bagazhit, është gjetur një çantë, brenda së cilës kishte 15 pako me lëndë të dyshuar narkotike kanabis, e përpunuar si çokollatë, të cilat pas peshimit rezultuan rreth 3.1 kilogramë.
Policia e Shqipërisë ka arrestuar shoferin e autobusit, i cili ishte shtetas i Shqipërisë me inicialet A.I.,43-vjeçar për veprën penale “Prodhimi dhe shitja e narkotikëve”.
Policia e Shtetit po vazhdon punën hetimore për t’i identifikuar dhe kapur personat të tjerë të përfshirë në këtë vepër. Për veprime të mëtejshme, materialet procedurale i janë dërguar Prokurorisë pranë Gjykatës së Shkallës së Parë në Kurbin.