Albulena Haxhiu, kryeparlamentare e Kuvendit të Kosovës, ka reaguar gjatë seancës së thirrur për zgjedhjen e presidentit, e cila është bojkotuar nga opozita.
Ajo kritikoi mungesën e partive opozitare, duke theksuar se ky veprim ka pasoja të drejtpërdrejta dhe ndikon në bllokimin e proceseve kushtetuese, si dhe e shtyn vendin drejt një krize të panevojshme.
“Mungesa e opozitës është një veprim që prodhon pasoja direkte, bllokimin e një procedure kushtetuese dhe shtyerjen e vendit drejt një krize të panevojshme”, u shpreh Haxhiu.
Duke iu referuar vendimit të Gjykatës Kushtetuese, ajo shtoi se deputetët janë të obliguar të marrin pjesë në seanca dhe të votojnë.
“Aktgjykimi i Gjykatës Kushtetuese e ka sqaruar këtë çështje në mënyrë përfundimtare: deputetët janë të obliguar që të jenë të pranishëm dhe të votojnë, përveç rasteve kur kanë marrë leje të rregullt paraprake”, tha ajo.