Dy persona kanë humbur jetën dhe 22 të tjerë janë plagosur pasi një makinë është futur në një turmë njerëzish në qytetin Leipzig, në lindje të Gjermanisë.
Ngjarja ndodhi të hënën pasdite në zonën qendrore Grimmaische Strabe. Sipas autoriteteve lokale, një automjet goditi disa persona dhe më pas u largua nga vendi i ngjarjes. Policia konfirmoi se tre nga të plagosurit janë në gjendje të rëndë.
Kryetari i Leipzig, Burkhard Jung, bëri të ditur se i dyshuari – një shtetas gjerman 33-vjeçar – është arrestuar, ndërsa motivi i sulmit mbetet ende i paqartë.
Ndërkohë, kryeministri i landit Saxony, Michael Kretschmer, deklaroi se i dyshuari kishte pasur më herët probleme të shëndetit mendor.
Autoritetet konfirmuan se viktimat janë një grua 63-vjeçare dhe një burrë 77-vjeçar, të dy shtetas gjermanë.
Prokuroria ka nisur hetimet për vrasje dhe tentativë vrasjeje, duke theksuar se aktualisht nuk ka indikacione për motive fetare apo politike.
Policia e cilësoi rastin si një akt të dhunshëm të kryer nga një person i vetëm dhe bëri të ditur se nuk ka rrezik të mëtejshëm për sigurinë publike.