Agjencia e Kosovës për Akreditim (AKA) është pranuar zyrtarisht në Shtetet e Bashkuara të Amerikës si “autoritet akreditues”, me vendim të Bordit të Këshillit për Akreditimin e Arsimit të Lartë (CHEA), i cili do të jetë i vlefshëm deri më 31 dhjetor 2033.
Sipas njoftimit të AKA-së, Bordi i Drejtorëve në CHEA ka miratuar rekomandimin për njohjen e agjencisë kosovare në këtë status.
Me këtë vendim, Kosova bëhet shteti i parë dhe i vetëm në Evropë që gëzon një njohje të tillë në SHBA në fushën e sigurimit të cilësisë në arsimin e lartë.
Ky zhvillim vjen më pak se një vit pas regjistrimit të AKA-së në Regjistrin Evropian për Sigurimin e Cilësisë në Arsimin e Lartë (EQAR), duke e bërë Kosovën gjithashtu të vetmin shtet në Ballkanin Perëndimor me këtë status.
Sipas AKA-së, vendimi është rezultat i një procesi të gjatë vlerësimi dhe konsiderohet dëshmi e reformave institucionale dhe përkushtimit për ngritjen e cilësisë në arsimin e lartë në Kosovë.