Prokuroria Themelore në Mitrovicë ka bërë të ditur se janë arrestuar dy mjekë të Spitalit në Vushtrri, nën dyshimin për korrupsion.
Sipas njoftimit, të mërkurën janë arrestuar dy mjekët me iniciale E.S. dhe V.R., të cilët dyshohen se kanë kryer veprën penale “Marrja e ryshfetit”.
Sipas dyshimeve fillestare, i dyshuari E.S. në tri raste, ndërsa i dyshuari V.R. në pesë raste, kanë kërkuar dhe pranuar para nga qytetarët për ofrimin e shërbimeve shëndetësore.
“Me vendim të prokurorit, të dyshuarve u është caktuar masa e ndalimit prej 48 orësh, ndërsa brenda afatit ligjor do të paraqitet kërkesa për caktimin e masës së sigurisë për të ndaluarit”, thuhet në njoftim.
Prokuroria Themelore në Mitrovicë ka thënë mbetet e përkushtuar në luftimin e korrupsionit, keqpërdorimit të detyrës zyrtare dhe çdo forme tjetër të kriminalitetit që cenon sundimin e ligjit, sigurinë publike dhe besimin e qytetarëve në institucionet publike.