Trajneri portugez, José Mourinho, ka shtuar edhe më shumë spekulimet për një rikthim të mundshëm te Real Madrid CF, pasi konfirmoi se negociatat për kontratën e re me SL Benfica janë pezulluar për momentin.
Në një deklaratë që ka bërë bujë në mediat sportive evropiane, Mourinho zbuloi se oferta e re nga Benfica kishte mbërritur të mërkurën, por ai kishte kërkuar kohë për të vendosur mbi të ardhmen e tij.
“Ditën e mërkurë mbërriti oferta e re nga Benfica. Por mesazhi im për klubin ishte: jo tani, faleminderit”, deklaroi Mourinho.
Ai shtoi se ditët e ardhshme do të jenë vendimtare për të ardhmen e tij.
“Të dielën do të shohim. Java e ardhshme është shumë e rëndësishme për të ardhmen time. Askush nuk duhet të shqetësohet nëse dikush qëndron apo largohet, sepse Benfica është dhe do të jetë gjithmonë më e madhe se kushdo”, u shpreh portugezi.
Mourinho u pyet edhe për presidentin e Real Madridit, Florentino Pérez, por ai shmangu komentet direkte.
“Nuk komentoj për presidentë dhe sidomos jo për Florentino Pérezin”, tha Mourinho, duke shtuar edhe më shumë misterin rreth kontakteve me klubin madrilen.
Sipas raportimeve të fundit, negociatat ndërmjet Mourinhos dhe Real Madridit kanë hyrë në fazat finale, ndërsa rikthimi i trajnerit portugez në “Santiago Bernabéu” po duket gjithnjë e më i mundshëm.
Mourinho e kishte drejtuar më parë Real Madridin nga viti 2010 deri më 2013, periudhë në të cilën fitoi titullin në La Liga, Kupën e Mbretit dhe Superkupën e Spanjës.