Instituti Kombëtar i Shëndetësisë Publike të Kosovës (IKShPK), ka njoftuar se nga 16 prilli deri më 6 korrik 2026 janë regjistruar gjithsej 52 raste të konfirmuara me fruth në vend.
Vetëm gjatë javës së fundit janë raportuar edhe pesë raste të reja.
Sipas të dhënave, numri më i madh i të infektuarve është në Prishtinë me 17 raste, pasuar nga Ferizaj me 12, Kaçanik me 6, Fushë-Kosovë me 5, ndërsa Lipjani, Vushtrria, Shtimja dhe Obiliqi kanë nga 2 raste secila. Raste të veçanta janë regjistruar edhe në Gjilan, Drenas, Deçan dhe Viti.
IKShPK u ka bërë thirrje qytetarëve që në rast të simptomave si temperaturë e lartë, skuqje në lëkurë, kollë, rrufë apo konjuktivit, të kërkojnë menjëherë ndihmë mjekësore.
Instituti thekson se fruthi është sëmundje shumë ngjitëse dhe apelon tek prindërit që të verifikojnë statusin e vaksinimit të fëmijëve, duke e cilësuar vaksinën si masën më efektive për parandalim dhe mbrojtje të shëndetit publik.