Analisti Imer Mushkolaj ka deklaruar se nuk është aspak e sigurt që Lidhja Demokratike e Kosovës (LDK) dhe Lëvizja Vetëvendosje (LVV) do të arrijnë një marrëveshje për zgjedhjen e presidentit të vendit.
Duke folur në emisionin “Debat Plus” në TV Dukagjini, Mushkolaj tha se nuk duhet të konsiderohet si çështje e përfunduar mundësia e një bashkëpunimi mes dy partive për këtë proces, duke theksuar se ende nuk ka garanci për një marrëveshje të tillë.
“Nuk është absolutisht punë e kryer, nuk është absolutisht e sigurt që LDK-ja dhe LVV-ja mund të arrijnë një koalicion, jo për qeverinë e Kuvendin, por për presidentin. Pse duhet LVV-ja ta marrë LDK-në në koalicion për qeveri, nëse e ka të sigurt se bashkë me LDK-në do të mund ta zgjedhë presidentin?”, u shpreh Mushkolaj.
Mushkolaj deklaroi se është shumë “pisk” të flasësh tani për zgjedhjen e mundshme të presidentit si çështje.