Deputeti i zgjedhur i Aleancës për Ardhmërinë e Kosovës (AAK), Burim Ramadani, ka kërkuar që NATO-ja të rishqyrtojë praninë statike të KFOR-it në urën kryesore mbi lumin Ibër në Mitrovicë.
Në një shkrim të publikuar në Facebook, Ramadani ka deklaruar se kushtet e sigurisë kanë ndryshuar dhe se largimi i pranisë së përhershme të KFOR-it në këtë lokacion nuk do të nënkuptonte dobësim të sigurisë, por një hap përpara.
“Ka ardhur momenti që prania statike e KFOR-it në urën kryesore të Mitrovicës të largohet. Jo si dobësim i sigurisë, por si hap përpara. Sepse, kushtet janë përmbushur”, ka shkruar Ramadani.
Ai ka theksuar se ura mbi Ibër për shumë vite ka qenë simbol i tensioneve dhe jostabilitetit, por sipas tij, situata aktuale e sigurisë është ndryshe dhe kërkon një qasje të re.
Ramadani ka shtuar se rishikimi i rolit të KFOR-it në këtë pikë duhet të bëhet duke marrë parasysh zhvillimet e fundit dhe përparimin në fushën e sigurisë.