Policia e Kosovës ka publikuar pamje nga arrestimi i të dyshuarit të fundit për krime lufte, me inicialet J.R.
Gjykata Themelore në Prishtinë më 3 gusht ka caktuar masën e paraburgimit prej një muaji, njofton Dukagjini.
Sipas Gjykatës, masa e paraburgimit është caktuar për shkak të rrezikut që i pandehuri mund të arratiset dhe të shmangë përgjegjësinë penale.
“Ekziston rrezik real që nëse i pandehuri lihet në liri, mund të arratiset me qëllim të fshehjes dhe ikjes nga përgjegjësia penale. Po ashtu, i njëjti është edhe shtetas i Serbisë, andaj ekziston rreziku real që të arratiset lehtë dhe të jetë i paarritshëm për organet e drejtësisë”, ka bërë të ditur Gjykata.
Në arsyetimin e vendimit thuhet gjithashtu se ekziston mundësia që i pandehuri të ndikojë në prova dhe dëshmitarë gjatë zhvillimit të procedurës.