Autoritetet kufitare të Shqipërisë dhe Greqisë kanë zhvilluar të shtunën një takim në Kakavijë, me qëllim koordinimin e masave për menaxhimin e fluksit të shtuar të qytetarëve në pikat e kalimit kufitar mes dy vendeve.
Takimi u zhvillua në ambientet e Qendrës së Përbashkët të Kontaktit për Bashkëpunimin Policor dhe Doganor në Kakavijë.
Në takim morën pjesë Drejtori i Departamentit për Kufirin dhe Migracionin, Saimir Muçaj, drejtues të Policisë Kufitare në Gjirokastër dhe Kakavijë, si dhe homologët e tyre nga Policia greke.
Pjesë e diskutimeve ishin edhe drejtuesit e Pikës së Kalimit Kufitar Kakavijë dhe të Drejtorisë së Kufirit në Janinë. Drejtori i Drejtorisë së Mbrojtjes së Kufirit në Policinë greke, kolonel Andreas Karageorgos, mori pjesë përmes lidhjes online.
Në qendër të takimit ishte menaxhimi më efikas i fluksit të udhëtarëve në hyrje dhe dalje, veçanërisht në periudhat me ngarkesë të shtuar, si dhe forcimi i bashkëpunimit ndërmjet dy policive në luftën kundër krimeve ndërkufitare.
Palët u zotuan për intensifikimin dhe koordinimin e masave në të gjitha pikat e kalimit kufitar, me synim përshpejtimin e procedurave dhe shmangien e radhëve të gjata.
Pas takimit, Muçaj deklaroi se shërbimet e Policisë Kufitare do të angazhohen maksimalisht dhe do të koordinojnë veprimet me autoritetet greke për krijimin e lehtësirave ligjore për qytetarët dhe reduktimin e pritjeve në kufi.