Pesë zyrtarë të Policisë së Kosovës kanë mbetur të lënduar si pasojë e një sulmi nga një kamioni, i cili dyshohej për kontrabandim mallrash. Kamioni ka dëmtuar automjetin e Policisë pas dy goditjesh.
Zyrtarët e Policisë së Kosovës janë penguar nga dy automjete civile në Komunën e Leposaviqit gjersa kishin tentuar të ndalonin një kamion, i cili dyshohej për kontrabandim mallrash.
Si pasojë e këtij sulmi, janë lënduar pesë zyrtarë policorë dhe është dëmtuar automjeti i policisë, njofton Policia e Kosovë.
Sipas një postimi të Policisë së Kosovës, kamioni i dyshuar, me një shpejtësi të madhe ka ardhur në drejtim të veturave dhe zyrtarëve policorë, me qëllim goditjen e tyre, dhe me këtë rast, kamioni ka goditur dy herë një veturë zyrtare policore.
Bëhet e ditur se me qëllim të ndalimit të rrezikut, janë përdorur edhe armët nga Policia e Kosovës.
“Duke parë rrezikun e lartë për jetën e zyrtarëve policorë si dhe pjesëmarrësit e tjerë në trafik, zyrtarët policorë kanë ndërmarrë veprimet e domosdoshme dhe proporcionale me qëllim të ndalimit të rrezikut duke edhe përdorur armën zyrtare”, thuhet në njoftim.
Ndërkaq, automjeti përgjegjës është ndaluar dhe vozitësi i tij me incinialet A.D, është arrestuar. Ai është dërguar në mbajtje duke iu inciniuar rastet “Kalim i Kufirit Ilegal”, “Kontrabandim Me Mallra”, dhe “Sulm ndaj Personit Zyrtar”.
Ndër të tjera, në vendin e ngjarjes kanë dalë njësia e hetimeve regjionale të policisë kufitare, njësia e antiterrorizmit, njësia e forenzikës si dhe Dogana e Kosovës.