Sot, më 24 shtator bëhen tre vjet nga vrasja në krye të detyrës e rreshterit të Policisë së Kosovës heroit, Afrim Bunjaku, gjatë sulmit të armatosur në Banjskë të Zveçanit.
Në shënim të trevjetorit të rënies së tij, Policia e Kosovës dhe Ministria e Punëve të Brendshme do të zhvillojnë gjatë ditës një sërë aktivitetesh përkujtimore.
Aktivitetet do të nisin në orën 10:00 me një vizitë te familja e Afrim Bunjakut në fshatin Samadrexhë të Vushtrrisë.
Në orën 10:40 do të zhvillohen homazhe te varri i tij, po në Samadrexhë.
Më pas, në orën 12:00, në fshatin Banjskë të Zveçanit, do të vendoset gurthemeli i obeliskut kushtuar Afrim Bunjakut.
Programi përkujtimor do të përmbyllet në orën 20:00 me Akademinë Përkujtimore, e cila do të mbahet në Sallën e Kuqe të Pallatit të Rinisë në Prishtinë.
Afrim Bunjaku u vra më 24 shtator 2023, gjatë një sulmi të armatosur ndaj Policisë së Kosovës në Banjskë. Në përleshjen mes policisë dhe grupit të armatosur u vranë edhe tre pjesëtarë të grupit sulmues.
Për sulmin në Banjskë, Prokuroria Speciale e Kosovës ngriti më 11 shtator 2024 aktakuzë ndaj 45 personave, përfshirë Milan Radoiçiqin. Sipas aktakuzës, të dyshuarit akuzohen për vepra që lidhen me terrorizmin, rendin kushtetues dhe sigurinë e Kosovës.
Më 24 prill 2026, Gjykata Themelore në Prishtinë dënoi me burgim të përjetshëm Blagoje Spasojeviqin dhe Vladimir Tolliqin, ndërsa Dushan Maksimoviqi u dënua me 30 vjet burgim për rastin e Banjskës. Vendimi është i shkallës së parë.
Në shpalljen e aktgjykimit ishte i pranishëm vetëm Maksimoviqi, ndërsa Spasojeviqi dhe Tolliqi nuk ishin në sallën e gjyqit. Për pjesën tjetër të të akuzuarve, përfshirë Milan Radoiçiqin, procedura mbetet e papërfunduar.
Radoiçiq, i cili është në mesin e 45 personave të akuzuar për rastin e Banjskës, ndodhet në Serbi. Autoritetet e Kosovës kanë kërkuar që ai dhe të dyshuarit e tjerë që ndodhen jashtë vendit të përballen me drejtësinë në Kosovë.