Të paktën 11 persona janë lënduar dhe janë dërguar në spital pas shembjes së një lokali në La Rioja, në veri të Spanjës, të shtunën në mëngjes.
Ngjarja ka ndodhur rreth orës 05:25 në San Vicente de la Sonsierra, ndërsa brenda lokalit ndodheshin rreth 25 deri në 30 persona, sipas autoriteteve spanjolle, shkruan Reuters, transmeton Dukagjini.
Shërbimet emergjente kanë ndërhyrë për të nxjerrë njerëzit nga rrënojat e ndërtesës së shembur. Ekipet e zjarrfikësve kanë kontrolluar vendin e ngjarjes për të verifikuar nëse kishte persona të tjerë të bllokuar.
Sipas autoriteteve, dëshmitarët kanë deklaruar se fillimisht është shembur dyshemeja e lokalit dhe më pas tavani.
Policia ka nisur hetimet për të përcaktuar shkakun e shembjes.