Të enjten e 21 korrikut, Ministrja e Drejtësisë, Albulena Haxhiu ka pritur në takim Ndihmëssekretaren e ShBA-së në Byronë Ndërkombëtare të Narkotikeve dhe Çështjeve të Zbatimit të Ligjit, Lisa Johnson dhe Ambasadorin e Amerikës në Kosovë, Jeffrey Hovenier.
“Bashkëpunim të shkëlqyer e quajti ministrja Haxhiu raportin me Ambasadën Amerikane në Kosovë, e cila ndër të tjera, përmes programeve si INL, OPDAT dhe ICITAP vazhdon të mbështesë procese të rëndësishme të sundimit të ligjit në Republikën e Kosovës”, thuhet në njoftim.
Sundimi i ligjit, lufta antikorrupsion, procesi i vettingut në sistemin e drejtësisë duke përfshirë edhe aspektet e drejtësisë penale, ishin tema të cilat zgjuan interesim nga ndihmëssekretarja Johnson, duke trajtuar po ashtu me një vëmendje të shtuar angazhimin e Ministrisë së Drejtësisë në nismat e saj që parandalojnë dhe luftojnë dukurinë e dhunës në familje.
Në kuadër të agjendës së ShBA-ve në luftën globale kundër korrupsionit, Johnson e vlerësoi si partner të rëndësishëm Republikën e Kosovës, për çka vlerësoi se ky bashkëpunim do të sjellë edhe rezultatet e saja në forcimin dhe zbatimin e ligjit dhe rendit juridik.
Të dyja palët u pajtuan që bashkëpunimi i deritanishëm ka sjellë rezultate të mira dhe se i njëjti do të vazhdojë edhe më tutje për t’i kontribuuar forcimit të sundimit të ligjit dhe drejtësisë në Kosovë.