Në raportin policor janë 78 raste të raportuara por llogaritet se numri i përgjithshëm i personave të dhunuar seksualisht gjatë luftës në Kosovë sillet në rreth 20.000, e që aktualisht janë në Njësinë e Hetimit të Krimeve të Luftës vetëm nga dy policë.
Ky numër i hetuesve nuk është i mjaftueshëm për Republikën e Kosovës.
Këtë e thekson dhe Ministria e Drejtësisë në një deklaratë për REL-in.
‘’Numri i hetuesve policorë, por edhe i prokurorëve dhe gjykatësve për hetimin dhe adresimin e rasteve, të cilat cilësohen si krime të luftës apo krime ndaj popullatës civile, është i pamjaftueshëm. Kosova aktualisht nuk ka kapacitete të mjaftueshme për adresimin e krimeve të luftës brenda sistemit të drejtësisë’’, thuhet në deklaratë.
Prokuroria Speciale e Republikës së Kosovës kishte thënë se trajtimi i lëndëve bëhet “me përkushtim”, por zvarritjet në trajtimin e rasteve, sipas tyre, lidhen me mbledhjen e ngadalshme të dëshmive nga policia hetuese në terren.
Me krimet e kohës së luftës në Kosovë, aktualisht, merren katër prokurorë e që mbi dy dekada pas luftës është vetëm një i dënuar për dhunë seksuale në luftë.