Një grup qytetarësh të thirrur në emër të organizatës “Qytetarët aktivë”, të hënën do të mbajnë një aksion në formë proteste kundër mbajtjes së festivalit “Sunny Hill”, në Parkun e Gërmisë.
Përmes një reagimi në Facebook, kjo organizatë e ka kritikuar Ministrinë e Mjedisit dhe Komunën e Prishtinës që sipas tyre kundërligjshëm i kanë dhënë lejen festivalit që të mbahet në Gërmi.
Ky veprim sipas tyre do ta degradojë natyrën dhe “larminë biologjike”. Sipas kësaj organizate, ndotja akustike siç e kanë quajtur ata e rrezikon shëndetin e kafshëve.
“Ndotja akustike ka pasoja te kafshët pasi e rrezikon aftësinë e tyre për të zbuluar gjahun ose grabitqarët dhe për të komunikuar me njëri-tjetrin. Si rezultat, zhurma indirekt ndikon në riprodhimin dhe mbijetesën e kafshëve të egra”, thuhet në reagimin e tyre.
![](https://scontent.fprn4-1.fna.fbcdn.net/v/t39.30808-6/295025226_591437092701227_2398446132678020257_n.jpg?_nc_cat=106&ccb=1-7&_nc_sid=730e14&_nc_ohc=cu_kHNd4dZMAX-Urq-g&_nc_ht=scontent.fprn4-1.fna&oh=00_AT9tIrWhHIwCU6Nro6lZ61rS35sRapzaCO9EsHwX_0gOUw&oe=62E2D3E1)
“U bëjmë thirrje institucioneve të mandatuara të mos kontribuojnë në vrasjen dhe shkatërrimin e mjedisit dhe habitateve të kafshëve të egra. Jemi pjesë e natyrës dhe pa të do të shkatërrohemi edhe ne të gjithë!”, vazhdon reagimi i tyre.
Disa nga motot e shkruara në pankarta me anë të të cilave do të protestohet janë “Shtëpi për kafshët e egra jo për festivale”, “Ndotja akustike rrezikon habitatin e kafshëve”, “Vrasësit e natyrës”, e kështu me radhë.
Festivali “Sunny Hill” i organizuar nga ylli botëror i muzikës Dua Lipa, do të mbahet në parkun e Gërmisë pas disa polemikave në mes të Komunës së Prishtinës dhe Ministrisë së Mjedisit.
![](https://scontent.fprn4-1.fna.fbcdn.net/v/t39.30808-6/295615740_591437146034555_100315386750827898_n.jpg?_nc_cat=102&ccb=1-7&_nc_sid=730e14&_nc_ohc=FmJwPFnXDtAAX9tb_j1&_nc_ht=scontent.fprn4-1.fna&oh=00_AT9y4AksAd1agZV8ice1907u7J4b81Kufp085McPUpvZJQ&oe=62E38612)