Nënkryetarja e Partisë Demokratike të Kosovës, Vlora Çitaku, ka thënë se pret nga Qeveria e Kosovës të tregojë seriozitet dhe bashkëpunim me aleatët ndërkombëtar pas situatave të tensionuara në Veri të Mitrovicës, mbrëmjen e së dielës.
Në një konferencë për media e cila vjen sikurse një reagim nga ana e Partisë Demokratike të Kosovës (PDK), Çitaku ka thënë se situata e mbrëmshme ka vërtetuar që aksioni për reciprocitetin e pjesshëm nuk ka qenë një veprim i menduar mirë, e aq më pak një veprim në koordinim me aleatët ndërkombëtarë.
Ndërkaq, pas takimit me Presidenten e Kosovës, Vjosa Osmani, Kryeministrin Kurti dhe dy zëvendëskryeministrat, Besnik Bislimi dhe Donika Gërvalla, Ambasadori i Shteteve të Bashkuara të Amerikës në Kosovë, Jeff Hovenier, ka kërkuar shtyerjen e implementimit të vendimeve të Qeverisë së Kosovës për 30 ditë.
E për këtë veprim, Çitaku e ka cilësuar sikurse “papjekuri politike” nga ana e Qeverisë së Kosovës.
“Nëse synimi i Qeverisë ka qenë zbatimi i recipocitet të pjesshëm, ka dështuar. Nëse qëllimi i qeverisë ka qenë të përfshijë aleatët ndërkombëtarë në moment të fundit, kjo tregon papjekuri politike”.
Gjersa ka theksuar se konfuzioni i krijuar në opinionin publik përgjatë mbrëmjes të së dielës dhe bllokimet e gjata të mërgimtarëve në pikat kufitare, Çitaku ka kërkuar nga Qeveria e Kosovës që të jetë e qartë përgjatë 30 ditëve të ardhshme.
“Kërkojmë nga qeveria që të jetë e qartë se çka do të ndodhë në 30 ditët e ardhshme… Presim nga qeveria që të tregojë seriozitet”, ka thënë Çitaku.
Qeveria shtyn vendimet, me kusht që deri të hënën të hiqen barrikadat në Veri