Mark Rutte është bërë kryeministri holandez më jetëgjatë të martën e 2 korrikut pasi është në detyrë për gati 12 vjet.
Ai është bërë për herë të parë kryeministër i Holandës në tetor të vitit 2010 dhe njihet nga disa si “Teflon Mark” për shkak të aftësisë së tij për t’u mbijetuar skandaleve.
“Është puna më e madhe në botë, një nder i pabesueshëm. Më duhet të them se tani ka një numër të madh enigmash në tavolinën time, por këto gjëra ndodhin”, ka thënë Rutte në fund të muajit të kaluar derisa politika holandeze ka hyrë në pushimet e saj verore.
Kryeministri 55-vjeçar i qendrës së djathtë kryeson Partinë Popullore për Liri dhe Demokraci (VVD), e cila pavarësisht rënies në sondazhet e fundit, prapë mbetet partia më e madhe në politikën holandeze.
Ndërkaq, tani është duke udhëhequr qeverinë e tij të katërt të koalicionit.
“Në thelb ai u bë kryeministër për shkak të dështimit të të tjerëve dhe jo për shkak të arritjeve të tij – vetëm sepse të tjerët u shembën më shumë se VVD”, ka thënë për AP shkencëtari politik André Krouwel i Vrije Universiteit Amsterdam.
Kjo e ka ndihmuar Rutte që të mbajë postin e lartë të politikës holandeze, pavarësisht nga krizat e dëmshme, duke përfshirë një skandal i cili përfshin mijëra familje të reja që janë zhytur në borxhe dhe dëshpërim pasi janë akuzuar gabimisht për mashtrim me përfitimet e fëmijëve, raporton euronews.
Koalicioni i tretë i Rutte ka dhënë dorëheqjen e tij për shkak të skandalit. Por ai është kthyer për të udhëhequr VVD-në drejt fitores në zgjedhjet e përgjithshme javë më vonë në mars 2021.
Rutte është lideri i dytë më jetëgjatë i zgjedhur në Bashkimin Evropian prej 27 vendesh, është vetëm pas Viktor Orban të Hungarisë.