Deputetët e Kuvendit të Kosovës, të enjten kanë miratuar një rezolutë, nga e cila i kërkohet Qeverisë së Kosovës që të sjell në Kuvend, Projektligjin për zyrtarët publikë deri më 15 tetor.
Pas interpelancës me ministrin e Punëve të Brendshme dhe Adminsitratës Publike, Xhelal Sveçla, të zgjedhurit e popullit me 72 vota pro miratuan rezolutën e propozuar nga AAK-ja.
Sveçla, ka deklaruar se Projektligji për zyrtarët publikë është në fazën përfundimtare të finalizimit.
Po ashtu, ai ka thënë ka thënë se një ndër prioritetet kyçe të Qeverisë së Kosovës është modernizimi i administratës publike, administratë të cilën synon ta shndërrojë në një administratë që do të ofrojë shërbime cilësore, shërbim ky i cili realizohet në kuadër të projektligjit.
Sipas Sveçlës dhe bazuar në fjalimin e tij të interpelancsë për Ligjin e Zyrtarëve Publik, që kjo të realizohet duhet bërë kompletimi i kornizës ligjore aktuale.
“Ligji për Zyrtarët Publik është një ndër ligjet që po i nënshtrohet rishikimit me qëllim të arritjes së këtij objektivi”, ka shkruar Sveçla.
Gjithashtu, shefi i Grupit Parlamentar të Aleancës për Ardhmërinë e Kosovës, Besnik Tahiri, ka kërkuar nga Qeveria që të sjell në Kuvend, Projektligjin për zyrtarët publikë, më së largu në mes të muajit shtator.
Në interpelancën e së enjtës në Kuvend, me ministrin Sveçla, Tahiri ka thënë se vetëm përmes miratimit të këtij projektligji dhe atij për paga, përmbushet reforma në administratën shtetërore.
Kuvendi i Kosovës në seancën e së enjtes ka miratuar edhe disa Projektligje
Kuvendi i Kosovës me 64 vota pro ka miratuar në lexim të dytë Projektligjin për financimin e subjekteve politike.
Pro projektligjit përveç mazhorancës u shprehën edhe deputetët e AAK-së, ndërsa ata nga PDK dhe LDK u përmbajtën nga votimi.
Ndërkaq, gjatë seancës, Kuvendi miratoi në lexim të dytë edhe Projektligjin për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive të Pavarura.
Po ashtu, u miratua edhe Projektligji për ndryshimin dhe plotësimin e Ligjit për Inspektoratin Shëndetësor, Projektligji për Inspektoratin sanitar të Kosovës dhe Projektligjin për të Drejtën Ndërkombëtare Private.
Sveçla për projektligjin për zyrtarët publikë: Jemi në fazën përfundimtare të finalizimit