Sekretari i Përgjithshëm i Kombeve të Bashkuara, Antonio Guterres tha të hënën se rreziku i konfrontimit bërthamor është rikthyer pas dekadash, duke u bërë thirrje shteteve bërthamore të angazhohen që të mos përdorin fillimisht armët.
Çdo sulm në një central bërthamor është një “gjë vetëvrasëse”, tha Guterres, duke iu përgjigjur raporteve për bombardimet e reja ruse të objektit të Zaporizhzhia në Ukrainë, njëkohësisht centrali më i madh bërthamor në Evropë.
Guterres foli në një konferencë shtypi në Tokio, pasi mori pjesë në Ceremoninë Përkujtimore të Paqes në Hiroshima të shtunën për të përkujtuar 77-vjetorin e bombardimit të parë atomik në botë.
Ai i bëri thirrje gjithashtu Japonisë që të ndalojë financimin publik dhe privat të projekteve të qymyrit si pjesë e angazhimeve të vendit në frenimin e emetimeve të karburanteve fosile.