Kryetari i Lidhjes Demokratike të Kosovës, Lumir Abdixhiku, gjatë takimit me ambasadoren e Izraelit në Kosovë, Tamas Ziv, ka diskutuar për thellimin e bashkëpunimit midis dy vendeve.
Me anë të një njoftimi për media thuhet se Abdixhiku ka vlerësuar që njohja e Kosovës nga Izraeli është një moment i rëndësishëm në forcimin dhe konsolidimin e subjektivitetit ndërkombëtar të Kosovës.
“Sot, kryetari i LDK-së, Lumir Abdixhiku, priti në takim ambasadoren e Izraelit në Kosovë, Tamar Ziv. Gjatë takimit u diskutua edhe për sfidat dhe nevojën e thellimit të bashkëpunimit mes dy vendeve, si në rrafshin politik ashtu edhe në atë ekonomik”, thuhet në njoftim.
I pari i LDK-së e falënderoi ambasadoren Ziv për vizitën si dhe rolin e shtetit të saj në mbështetje të Kosovës, me ç’rast edhe u dakorduan që bashkëpunimi mes Republikës së Kosovës dhe Izraelit të intensifikohet edhe më tej.
Ndryshe, të martën e nëntë gushtit, kryetari i Aleancës për Ardhmërinë e Kosovës(AAK), Ramush Haradinaj, ka pritur në takim ambasadoren e Izraelit në Kosovë, Tamar Ziv.
Ai ka thënë se njohja e Kosovës nga Izraeli ka hapur dyert për thellimin dhe avancimin e marrëdhënieve ndërmjet dy shteteve e popujve dhe ka forcuar subjektivitetin ndërkombëtar të vendit tonë.
Po ashtu, edhe gjatë ditës së djeshme, Partia Demokratike e Kosovës(PDK) ka pritur në takim ambasadoren Ziv.
Në këtë takim, nënkryetarët e kësaj partie kanë diskutuar për mundësitë e bashkëpunimit mes Kosovës dhe Izraelit pas forcimit të marrëdhënieve diplomatike ndërmjet tyre.
Po ashtu, edhe Zëvendëskryeministri për Integrim Evropian, Zhvillim dhe Dialog, Besnik Bislimi, është takuar me ambasadoren e Izraelit në Kosovë, Tamar Ziv, me të cilën ka diskutuar për krizën në Veri dhe çështjen e liberalizimit të vizave për qytetarët e Kosovës.
Në një komunikatë për media nga zyra e Kryeministrisë, thuhet se në këtë takim është diskutuar edhe për avancimin e partneritetit dhe bashkëpunimit midis Kosovës dhe Izraelit.
Pos kësaj, një nga temat e përmendura gjatë takimit është edhe mungesa e liberalizimit të vizave për qytetarët dhe izolimi i Kosovës.
Po ashtu, sipas njoftimit, Bislimi ka folur edhe mbi situatën në veri dhe dy vendimet e Qeverisë mbi targat dhe dokumentet për hyrje-dalje, të cilat do të nisin implementimin dhe zbatimin e tyre nga një shtatori.