Kryetari i Komunës së Drenasit, Ramiz Lladrovci, e ka kritikuar kryeministrin e Kosovës, Albin Kurti, për ndarjen e 40 milionë eurove për rrymën e paguar për banorët e komunave veriore.
“Çka është shumë është shumë, megjithatë detyrimet ndërkombëtare po i zbaton, edhe qershitë e rezervuara për veriun, një për një shkuan”, ka shkruar Lladrovci në Facebook.
Ai e ka pyetur kryeministrin Kurti “Me çfarë buxheti paguhet ministri juaj, Goran Rakiq, që nuk e pranon shtetin e Kosovës. Ai deklaron hapur se as nuk e njeh as nuk do ta njohë Republikën e Kosovës”.
Sipas tij, me anë të Kushtetutës së Kosovës lejohen të bëhen ndryshime në kabinetin qeveritar.
“Kujtoja vendimin që ka nënshkruar kur është emëruar ministër. Ndryshe, le të flasë nga përtej gardhit, jashtë Qeverisë. Kushtetuta ta lejon për të bërë ndryshim në kabinet qeveritar edhe me u dhanë shembull të tjerëve se kushdo ha bukën e buxhetit të Republikës së Kosovës, nuk mund ta përmbysë as të pështyjë në të”, ka shkruar tutje ai.
“Albin, a s’po sheh a s’po do me pa! Vepro, kalo nga fjalët në vepra”, ka përfunduar postimin Lladrovci.