Në Këshillin e Sigurimit (KS), është dënuar pushtimi rus mbi Ukrainën, nga i dërguari i përhershëm i Shqipërisë në Organizatën e Kombeve të Bashkuara, Ferit Hoxha.
Diplomati shqiptarë tha se Shqipëria mbështet popullin ukrainas dhe presidentin Volodymir Zelensky dhe se Putinit sipas tij i dështuan parashikimet kur nuk arriti ta marrë Kievin.
Kievi i doli më i fortë se sa ishte menduar dhe se Rusia nuk mund ta nënshtrojë Ukrainën, ajo ngeci mirëpo nuk i ka ndalur bombardimet, ka thënë Hoxha.
“Është absurde se si Rusia po përpiqet të bindë botën se tanket e lëna pas apo trupat e civilëve të vrarë e të djegur, janë pjesë e propagandës ukrainase”, është shprehur ambasadori shqiptar në KS.
“Të presim Rusinë të thotë të vërtetën, është si të presim Godonë. Kurrë nuk do të vijë”, por se lajmi i vërtetë në këtë mes, është ajo çfarë Rusia po lë pas, ka deklaruar ai.
“Ajo çfarë Rusia po lë pas, janë pamjet tronditëse dhe civilët e ekzekutuar nga forcat ruse”, ka deklaruar Hoxha në fjalën e tij.
Që nga fillimi i invazionit rus mbi Ukrainën, por edhe më herët (nga 2014), Shqipëria ka mbrojtur të drejtën e Ukrainës.
