Gjobë me nga 700 euro kanë marrë të mërkurën dy thertore në Komunën e Gjilanit.
Këtë e bëri të ditur i pari i kësaj komune Alban Hyseni, i cili përmes një postimi në Facebook, u bëri thirrje bizneseve të kujdesen për ambientin.
“Gjatë 24 orëve të fundit nga drejtoria e Inspekcionit, pas inspektimeve në terren dhe sigurimit të dëshmive nga palët ankuese, janë shqiptuar gjobat konform Rregullores Komunale pasi që është konstatuar ndotja e lumenjve me gjak dhe mbetje fundrrinore, e cila është bërë gjatë trajtimit të ujërave të impianteve të dy therrtoreve në afërsi”, ka thënë kryetari i Gjilanit.
Në lidhje me këtë cështje ishin ankuar banorët e qytetit të Gjilanit për ndotjen në zonat afër banimit. Pas kësaj inspekcioni përmes një aksioni i ka dënuar dy thertoret në fjalë.