Shefi i policisë japoneze, Itaru Nakamura, ka thënë se do të japë dorëheqje pas vrasjes së ish-kryeministrit, Shinzo Abe. Ai tha se donte të merrte përgjegjësinë për të shtënat e 8 korrikut.
Një hetim ka gjetur se kishte të meta serioze në mënyrën sesi ish-kryeministri mbrohej, transmeton BBC.
Ish-kryeministri Abe u qëllua teksa fliste në një ngjarje të fushatës politike në qytetin e Nara. 67-vjeçari ka pësuar plagë në qafë dhe dëmtime në zemër, kanë bërë të ditur mjekët.
Policia lokale ka pranuar tashmë të meta “të pamohueshme” në sigurinë e Abe-së.
“Në procesin e verifikimit të planit tonë të ri të sigurisë, ne kemi kuptuar se detyrat tona të sigurisë do të kishin nevojë për një fillim të ri,” tha Nakamura në një konferencë shtypi, ndërsa njoftoi dorëheqjen e tij.
Ekspertët e sigurisë, të cilët kanë shqyrtuar pamjet e sulmit, i kanë thënë më parë agjencisë së lajmeve “Reuters” se truprojat mund ta kishin shpëtuar Abe-në duke e mbrojtur atë ose duke e tërhequr nga vija e zjarrit në 2.5 sekonda ndërmjet një goditjeje të parë të humbur dhe të shtënës së dytë, fatale.
I dyshuari, Tetsuya Yamagami, u arrestua në vendngjarje dhe pranoi se kishte qëlluar Abe-në, tha policia.
Abe ishte politikani më i njohur i Japonisë dhe kryeministri më jetëgjatë.
Shinzo Abe shërbeu si kryeministër për një periudhë të shkurtër, përkatësisht nga viti 2006 deri më 2007 përpara se të mbante postin më të lartë politik të vendit përsëri nga 2012 deri në 2020.
Partia e tij Liberale Demokratike e qendrës së djathtë ka dominuar politikën japoneze qëkur u themelua në vitin 1955.
Shinzo Abe, personazhi afatgjatë në peisazhin politik të Japonisë