Njësiteve të KFOR-it, në patrullimet e tyre në veri të Kosovës, i është bashkuar edhe misioni i EULEX-it.
Kështu është bërë e ditur në një përgjigje me shkrim për RTV Dukagjini, nga misioni i KFOR-it në Kosovë.
Këto masa sipas sipas tyre janë marrë për të mundësuar reagimin e shpejtë në rast të ndonjë eskalimi të mundshëm të situatës.
“Për të rritur ndërgjegjësimin e situatës, ajo ka rritur praninë e saj në afërsi të pikave të kalimit JARINJE dhe BRNJAK, ka ngritur disa pika të kontrollit të trafikut dhe ka rritur patrullimin në zonë së bashku me personelin e Njësisë së Specializuar Shumëkombëshe Karabiniere dhe misionin e BE-së për Sundimin e Ligjit. (EULEX). Këto masa janë marrë për t’i mundësuar KFOR-it të reagojë me shpejtësi ndaj çdo sfide të sigurisë, në përputhje me mandatin e tij të OKB-së”, thuhet në përgjigjen e tyre.
EULEX-i, si reagues i dytë i sigurisë, i ka konfirmuar Dukagjinit se Njësisa e saj Policore e përbërë nga 105 policë polakë është duke kryer patrullime në veri.
Ndërhyrja e tyre eventuale, sipas misionit, mund të bëhet vetëm pas një kërkese të qartë dhe me shkrim nga Policia e Kosovës në drejtim të EULEX-it.
“EULEX-i mbetet vigjilent dhe po monitoron nga afër të gjitha zhvillimet që mund të ndikojnë në sigurinë e Kosovës, si dhe në sigurinë e të gjithë popujve në Kosovë në përputhje me mandatin tonë. Rritja e patrullave zbuluese tregon vendosmërinë e EULEX-it që të vazhdojë të mbështesë stabilitetin e Kosovës dhe të kontribuojë në sigurinë e grave, burrave, vajzave dhe djemve nga të gjitha komunitetet në Kosovë”.
Kurse KFOR-i tutje thotë se komandanti Ferenc Kajari në kontakt të rregullt si me organizatat e sigurisë së Kosovës ashtu edhe me shefin e Mbrojtjes në Serbi.
Kajari, të premten ka takuar udhëheqësit e Listës Serbe dhe kryetarët e katër komunave me shumicë serbe në veri.
Sipas një komunikate për media të Listës Serbe, në takim I është kërkuar Kajarit që KFOR-i të përmbushë mandatin e tij dhe të ofrojnë siguri për serbët në këtë pjesë.
Përfaqësuesit e serbëve të Kosovës në të njëjtin objekt pritën edhe emisarin e BE-së për dialogun, Miroslav Lajçak dhe të dërguarin e SHBA-së për Ballkanin Perëndimor, Gabriel Escobar.