Ministrja e Drejtësisë ka kërkuar që të ndërmerren veprime konkrete ndaj fenomenit të dhunës ndaj grave dhe vajzave, njëherësh edhe ndaj dhunës në familje. Sipas Haxhiut, lufta ndaj dhunës në familje, grave e vajzave, mbetet një luftë pa kompromis.
Grupi koordinues ndërministror kundër dhunës në familje ka mbajtur takimin e radhës të mërkurën, kryesuar nga Zëvëndësministrja e Drejtësisë, Nita Shala.
Pjesë e grupit koordinues ndërministror ishin përfaqësues nga policia, prokuroria, mbrojtësit e viktimave, gjykata, Minsitria e Shëndetësisë, Ministria e Arsimit, Shkencës dhe Teknologjisë, Ministria e Punëve të Brendshme, Agjensia për Barazi Gjinore, Avokati i Popullit, dhe përfaqësues të institucioneve partnere ndërkombëtare e organizatave të shoqërisë civile.
Gjithashtu, pjesë e grupit koordinues ndërministror ishte edhe Deputetja e Kuvendit të Kosovës, Duda Balje, e cila ka diskutuar mbi zhvillimet drejt hartimit të projekt-Ligjit për Mbrojtje nga Dhuna në Familje, bën të ditur Ministria e Drejtësisë.
Ky grup ka adresuar raportet mbi progresin e zbatimit të Planit të Veprimit të Strategjisë Kombëtare për Mbrojtjen nga Dhuna në Familje, është raportuar mbi punimet e Grupit të Përgjigjes Emergjente dhe hapave drejt krijimit të Komisionit Profesional, i cili do të bëjë analizën e dakorduar nga anëtarët e Grupit të Përgjigjes Emergjente.
Ndërkaq, u diskutua edhe mbi databazën për mbrojtje nga dhuna në familje, rëndësinë dhe potencialin e saj dhe njëherësh, edhe për planifikimin e fushatës sensibilizuese “16 ditë aktivizimi kundër dhunës në familje”.