Ish-ministri i Arsimit, Shyqyri Bytyqi, në emisionin “FIVE” në RTV Dukagjini, ka folur për krizën në arsim, e cila sipas tij, nuk po tejkalohet për shkak të inateve personale.
“Po të mos ishin këto inatet personale dhe kalimi në ekstreme për të treguar se kush është më i forti, zgjidhja do të kishte ndodhur që në javën parë”, ka thënë Bytyqi.
Ai ka thënë se Qeveria Kurti 2 përshpejtoi publikimin e pakos së ndihmës financiare me nga 50 euro, për ta injoruar grevën.
Sipas tij, qeveria do të duhej që të ulej në tavolinën e bisedimeve me Këshillin Grevist, dhe t’i shpjegonte arsyet se pse nuk po mundte t’i realizonte kërkesat e tyre, e pastaj ta publikonte pakon e ndihmës financiare. Kjo, sipas Bytyqit, do ta ndërpriste grevën.
“Grevistët nuk do të kishin arsye të thonin se qeveria nuk bashkëpunoi, dhe nuk na ofroi asnjë alternativë dhe e dyta do të humbisni betejën në opinion, sepse qeveria u ofroi një alternativë”.
“Duke e injoruar grevën na prezantohen këto inate, që dëmtohet grupi që nuk ka faj aspak, të cilët janë nxënësit”, ka theksuar ai.