Filmi kosovar “Vera Andrron Detin”, do të hapë edicionin e 14-të të Festivalit të Filmit “PriFest” në Prishtinë, film ky që shtjellon një temë shumë të rëndësishme lidhur me pronën dhe të drejtat e grave në pronë.
Filmi është bashkëpunim mes Kosovës, Maqedonisë së Veriut dhe Shqipërisë. Ndërsa, në rolet kryesore luajnë, Teuta Jegeni Ajdini, Alketa Sylaj, Refet Abazi dhe Astrit Kabashi.
E rëndësishme është se përveç që tashmë janë të ditur edhe filmat që do të garojnë për çmimet kryesore, gjithashtu është njoftuar se çmimi kryesor “Hyjnesha e Kuqe” do të mbajë emrin “Vjosa Berisha” dhe do të nisë të ndahet nga ky edicion.
Edicioni i 14-të i “PriFest”-it mbahet nga 20 deri më 25 shtator 2022 dhe i dedikohet drejtoreshës së ndjerë, Vjosa Berisha.
“Jemi të lumtur që sikurse edhe hapja e PriFest-it, me filmin ‘‘Vera Andrron Detin’’, edhe në mbyllje do të kemi film në gjuhën shqipe, ’’Virgjëresha Shqiptare’’, për më shumë edhe me pjesëmarrje të madhe të filmbërësve nga Kosova. E kemi thënë shumë herë, promovimi dhe përkrahja e filmave vendor dhe filmbërësve tanë është një nga objektivat kryesore të festivalit”, ka thënë Fatos Berisha, bashkëthemelues i festivalit, shkruan Kultplus, transmeton portali Dukagjini.
PriFest shënon edicionin e 14-të këtë vit dhe për herë të parë do të mbahet me mungesë të drejtoreshës së festivalit, Vjosa Berisha, e cila vdiq më 23 qershor të këtij viti. Ky edicion do ta kujtojë dhe do ta nderojë atë.