Të martën e 20 shtatorit, kryeministri i Kosovës, Albin Kurti i ka uruar mirëseardhje në Kosovë, Koordinatores për Zhvillim të Kombeve të Bashkuara në Kosovë Arnhild Spence, e cila vizitoi këtë vend në fillim të mandatit të saj.
Kreu i Qeverisë ndër të tjera ka rikonfirmuar gatishmërinë e Qeverisë për të bashkëpunuar ngushtë me OKB në tejkalimin e sfidave të përbashkëta, me vullnet të mirë dhe analiza të duhura.
Shefi i ekzekutivit ka shprehur mirënjohje të veçantë për punën e kësaj organizate dhe bashkëpunimin me institucionet e vendit.
Spence po ashtu ka theksuar vazhdimin e përkrahjes nga OKB për thellimin e bashkëpunimit te shkëlqyer dhe produktiv, në arritjen e progresit lidhur me Objektivat e Zhvillimit të Qëndrueshëm.
Ajo vlerësoi angazhimin e Kryeministrit Kurti në Komitetin Drejtues të Kornizës së Bashkëpunimit për Zhvillim të Qëndrueshëm të Kombeve të Bashkuara (UNSDCF), për periudhën 2021-2025.
Gjithashtu u vlerësua puna e përbashkët e Qeverisë dhe OKB-së për të arritur vizionin afatgjatë që i mundëson Kosovës të jetë pjesë e përpjekjeve globale për arritjen e Objektivave të Zhvillimit të Qëndrueshëm.
Po ashtu gjatë ditës së hënë, kryetari i Kuvendit të Kosovës ka pritur në takim Koordinatoren Spence.
Në takim, Konjufca ka shprehur mirënjohje ndaj Spence, për punën e misionit të Kombeve të Bashkuara, me fokus të veçantë në mbështetjen e progresit dhe zhvillimit të qëndrueshëm në Kosovë.