Mjetet e protestës u kanë mbetur në zyrë. Anulimi i vizitës në Kosovë të kryetares së Dhomave të Specializuara, Ekaterina Trendafilova, ka bërë që edhe protesta kundër saj të dështoj.
“Ajo kur e pa që organizimi po është i madh, edhe kundërshtimi do të jetë më i madh se që ata kanë mendu e anuloj krejt vizitën. Pra e bëri një kalkulim tipik politik. Diçka që një gjykatë normale nuk do të duhej ta bënte”, ka thënë Nushi.
Nol Nushi nga Partia Socialdemokrate, i konsideron të njëanshme takimet Trendafilovës me gazetarët dhe shoqërinë civile.
“Gjykata vetëm flet dhe tregon atë që dëshiron ajo dhe nuk është fare e hapur për publikun. Pjesëmarrja në këtë konferencë e cila nuk u mbajt ka qenë shumë e vështirë. Ndoshta vetëm ju gazetarët keni pasur mundësinë që të keni ndonjë qasje, mirëpo ne si qytetar, unë me pas apliku aty nuk ka qenë e mundur të marrë pjesë”, ka shtuar ai.
Protestës së organizuar nga PSD, ishte planifikuar që t’i bashkoheshin edhe shoqatat e dala nga lufta.
Një protestë më të vogël se kjo që u organizua për të mërkurën, PSD e kishte mbajtur edhe në vizitën e fundit të Trëndafilovas në Prishtinë.
Në diskutimin e saj me gazetarët, Trëndafilova tregoi se një gjykim për krime lufte është drejt përfundimit në shkallë të parë, kurse një tjetër pritet të filloj në fundvit.
Avokati Tahir Rrecaj vlerëson se këto gjykime u përcollën me shumë probleme.
“Mendoj se ka pasur vonesa në aspektin e afatit të përfundimit të procedurave, qoftë në fazën e hetimeve, dhe në veçanti pas ngritjes së aktakuzës… Janë procese gjyqësore të cilat kërkojnë kohë më të gjatë se në kushte normale. Sidoqoftë, konsideroj se proceset gjyqësore janë të vonuara, nganjëherë edhe pa arsye”, ka theksuar Rrecaj.
Presidentja e Dhomave të Specializuara, të mërkurën nuk përjashtoi mundësinë që Kosovën, pas dy dështimeve, ta vizitoj përsëri në një të ardhme.